كيما عملنا ثورتنا

اليوم نكتبو دستورنا

حقوقنا نعرفوها،

واليوم لازمنا نضمنوها.

إذا ماندافعوش على رواحنا

حتّى حد ما يدافع علينا.

الدّستور موش قانون واكهو

دستورنا هو كرامتنا

دستورنا هو حرّيتنا.

دستورنا هو تنميّتنا.

دستورنا هو مستقبلنا.

في دستورنا

موش الدّولة اللّي تضمّن الحرّية.

الدّولة تلتزم باش ما تتعدّاش على الحرّية

في دستورنا

موش الحكومة اللّي تعيّن ممثليها في الجهات.

المواطنين هوما اللّي ينتخبوا ممثّليهم.

في دستورنا

المجالس الجهويّة المنتخبة تعوّض الوالي

والمجالس المحلية المنتخبة تعوّض المعتمد والعمدة

في دستورنا

في كلّ قرية بلديّة... يزّينا م التّهميش.

في دستورنا

الحكومة ما يعيّنهاش الرّئيس

الحكومة يعيّنها البرلمان المنتخب

في دستورنا

رئيس الجمهوريّة المنتخب من الشعب يولي سلطة رقابة على الحكومة.

وهكّاكة هي والبرلمان ما يستبدّوش بالسّلطة المطلقة.

في دستورنا

القضاء يولّي سلطة: سلطة موحّدة متماسكة ومستقلة.

موش كيما توّه، كلّ هيئة قضائيّة تابعة لوزارة.

في دستورنا

الكلنا نراقبو الحكومة.

يلزمنا نعرفو كلّ شيء على الإدارة وكيفاش تسيّر أمورها

باش نعرفو فلوسنا وثورة بلادنا فين وكيفاش ماشين

في دستورنا

كلّ تونسي عندو الحق في الشغل وفي الأجر العادل

والتّعويض العادل على البطالة

في دستورنا

كلّ تونسي عندو الحق في التّنمية والتّضامن

بين التّوانسة الكل وبين الجهات

في دستورنا

التّوانسة الكل متساوين، نساء ورجال،

كبار وصغار

مهما كان لونهم ومهما كان دينهم.

في دستورنا

اقتصادنا يقضي على البطالة...

اقتصادنا يحافظ على البيئة وعلى ثروات البلاد.

باش غدوة أولادنا يتمتعوا ببلادنا.

في دستورنا

الفصل الأوّل يعرّف الدّولة: دولتنا جمهوريّة تعدّديّة لا مركزيّة.

الفصل الثاني، يعرّف بشعبنا: متأصّل في التّاريخ وانتماؤه عربي إسلامي

ومتفتّح على بقيّة الحضارات...

يزينا ما خلطنا في المفاهيم.

دستورنا

كيما كتبناه مع بعضنا

باش ندافعو عليه مع بعضنا

بيكم باش يوصل دستورنا.

ومعاكم باش ينجح دستورنا

ونبنيو تونس... تونسنا العريقة.

تونس اللي نحبّوها.

تونس اللّي اليوم أمانة بين يدينا...